பொன்னுடல் நெஞ்சில் பெரியார்
புகன்றவை போற்றி போற்றித்
தென்றலை மிஞ்சும் மென்மை
தேனிதழ் தன்னில் தேக்கித்
தன்னல மில்லா வாழ்வில்
தன்னையே கரைத்த தம்பி
சென்றது மெங்கே யென்று
தேடுவோம் தினமும் காலை
தந்தைதாய் மறுத்த போதும்
தயவுடன் கெஞ்சிக் கெஞ்சிக்
கந்தையா யிருந்தோர் வாழ்வில்
கல்வியைப் புகட்டு தற்கு
முந்தியை விரித்துத் தானம்
முடிந்தவ ரிடத்தில் பெற்று
சிந்திய வேர்வை யிந்தச்
சீர்மிகு நிலத்தைக் காக்கும்
வந்தரு ளென்றே யுன்னை
வாயினா லழைக்க மாட்டேன்
தந்தது போதும் தம்பி
தாயக வுரிமைப் போரில்
முந்திநீ நின்றாய் நாளும்
முடிந்தவை யாவுஞ் செய்தாய்
சிந்தையில் நினைத்த தெல்லாம்
செயலினில் செய்வோ மய்யா!!
No comments:
Post a Comment